جريش

اليريش او الجريش واحد من الاطباق الي تعلمتها برمضان كنت احس هالطبخه اختراع ومستحيل اسويها بس طلعت
سهله وما يبيلها شي
المقادير:
1 كوب جريش مغسول ومنقوع
2 فخذ دجاج
1 بصل كبير
2 طماط
تقريبا 2 م ك معجون طماط
البهارات:
ملح - فلفل - لومي مطحون - كركم - كزبرة - كمون

الطريقة:
1. نحمس البصل بعدين الدجاج انا استخدمت الفخذ اذا تحبون صدر عادي
2. نحط البهارات ونحمسهم عدل
3. نضيف المعجون والطماط والملح ونخليهم ليما يذبل الطماط ويصير صوص
4. نضيف الجريش والماي ... ماي الجريش اكثر من ماي العيش وكل ما حسيتي قل زيدي ماي
5. نخليها تطبخ ساعة او اكثر بس اهم شي كل شوي تحركينها عشان ما يحترق بقاع الجدر

الحشو:
بصل مفروم نحمسة بشوي زيت
وبهاراته : ملح وفلفل ولومي مطحون

تشريبة لحم

اليوم اول مره اسوي تشريبة وحمدالله كانت حلوة
المقادير:
لحم
بطاط - جزر - باذنجان
1بصل مفروم
1طماط مفروم
معجون طماط
البهارات:
كركم - كاري - ملح وفلفل

التشريبة عبارة عن مرقة خفيفية والي ما يعرفون هذي الطريقة:
نحمس البصل بالزيت ليما يتغير لونة بس ما يحترق
نضيف اللحم ونحمسة عدل ليما يتغير لونة نضيف البهارات وحمسة اللحم اهم خطوة لازم تتاكدون ان انحمس عدل
نضيف المعجون
نحط البطاط والجزر وفوق والطماط والملح ونخفف النار ليما يذبل الطماط عدل
بعدها نضيف الماي ليما يغطي اللحم ويفضل ما نكثر ماي كل ما تحسين احتجتي زيدي شوي
اخر شي هذي اضافه من امي
قبل ما نسكر عليها نضيف حلقات باذنجان مقلية

الحين المرق عندنا جاهز
نحط خبز الرقاق بالصحن وفوقه المرق

وعليكم بالف عافية

زبيدي بقاع الجدر

اتوقع كان يوم 14 رمضان كنت اشوف واحد من البرامج المميزة في رمضان "جدر الوالدة" على قناة الكويت الاولى

عاد كانت حلقتهم عن سمج بقاع الجدر وعجبني شكلها وسهلة

ولان الزبيدي المفضل اشترينا زبيدي وكان فطورنا عجيييييييييييييب

المقادير:

زبيدي تملحونة وتقلونة بدون اي بهارات او كركم

عيش مشخول

الحشو:

كزبرة + شبنت + نعناع + بصل مفروم

ملح + فلفل + لومي مطحون + كركم + كزبرة + كمون

الطريقة:

نخلط البصل " كمية كبيرة" مع باجي الحشو والبهارات والملح بدون ما نحمسلهم كل شي ني

نحط فوقهم الزبيدية المقلية وفوقها العيش

وتخلينها تطبخ على راحتها تقريبا نص ساعة

ولا تنسون الدقوس

فتة حمص

المقادير:

1. خبزة " المطاحن" مقطعة مكعبات مقلية او بالفرن

2. نخي "حمص" انا استخدمت كالفورنيا بس اذا عندكم شغل بيت احسن

3. الصوص:

1 م ص هردة مذوبه بعصير نص ليمونة + علبة روب + فص ثوم

ونقدمهم في طبق اول شي الخبز فوقة الحمص واخر شي الصوص

ملاحظة:

ما نجمع المكونات بالطبق الا وقت التقديم عشان ما يذبل الخبز

وعليكم بالف عافية

خبز الفوكاشيا

focaccia bread

المقادير:

3 ك طحين منخول

1 م ك خميرة \ bp

2 بيض

اقل من كوب ماي

ربع ك زيت زيتون

رشة ملح

1 م ص سكر

الحشوة:

2 بصل جوانح

4 م ك زيت زيتون

1\2 م ك زبدة

1ثوم

زيتون اسود

1 م ك بلسمك

الطريقة:

العجينة :

نخلط المكونات الجافه مع البيض بعدها الماي بالتدريج

واخر شي زيت الزيتون

بالبداية تكون العجينة تتلصق بس بعد ما تختمر 1\2 ساعة نضيف عليها تقريا 1\4 ك طحين او اقل

هالعجينة تعطينا 4 اقراص خبز صغار او اثنين كبار

لما نفرد العجينة ما نستخدم النشابه نفرد كل كرة مباشر باليد على صينية الفرن ونتركا ترتاح بعد الفرد كحد اقصى 5 دقايق

بعدها نسوي علامات بالاصابع على العجينة ونحط فوقها الحشوة وتدخل فرن حار تقريبا 10 دقايق او لحد ما تحمر نشغل الشوايه من فوق

عشان تاخذ لون اشقر

الحشوة:

1. نقطع البصل جوانح ضعيفة ونحطها بجدر مع زيت الزيتون وملح على حرارة واطية ونغطي الجدر بس لازم نحرك البصل كل شوي عشان

ما يحترق لحد ما يذبل البصل نضيف الثوم ونغطي الجدر مرة ثانية ليما يصير لون البصل اشقر يميل للبني نضيف الزبدة والبلسمك والزيتون بس 5 دقايق ويكون البصل جاهز

ملاحظة:

تقدم الفوكاشيا مع زيت الزيتون وخل البلسمك

خبز السميط + لبن عيران

simit bread

المقادير:

1\2 2 كوب طحين ابيض

50 غرام زبدة تفريبا 1\2 قالب

2 م ك زيت زيتون

بيضة

5 م ك حليب بودر

رشه ملح

1 م ك خميرة \ سكر

للزينة:

بياض بيضة + 1 م ك زبدة

سمسم

الطريقة:

1. نخلط الطحين المنخول مع السكر والملح والزبدة والزيت

2. نضيف الخميرة + الحليب + البيض

3. نضيف الماي بالتدريج

4. تتخمر العجينة في المرحلة الاولى ساعة بعدها نقسم العجينة كور تتخمر مرة ثانية نص ساعة

5. نفرد كل كورة بالطول ونلفها بشكل دائرة وهذا لنك الفيديو :
http://www.youtube.com/watch?v=ZQI0OMlmEio

6. ندهن الوجة بخليط بياض البيض والزبدة ونرشها سمسم وتدخل الفرن

لبن عيران:

4 روب

3 كوب ماي

2 م ص ملح

نعناع مجفف 1 م ك

ملاحظة:

كمية الماي مبدئية انا بالنسبه لي كثافته ممتازة بس ممكن تخفيف اكثر اذا تحبون اللبن خفيف

اما الملح فاضافته بالتدريج وحسب الرغبة

نخي بالفلفل

المقادير:

كوب نخي ( حمص) يابس

زيت نباتي

م ك حبوب الخردل

م ك حبوب الحلبة

فلفل احمر مجروش

بصلة صغيرة مفرومة

الطريقة:

ننقع النخي قبل يوم او حتى من الصبح بعدين نسلقة بماي وملح

نسخن زيت بالجدر شوي يعني تقريبا خمس قفاش كبار ونحمر البصل عدل و نضيف الحلبة والخردل والفلفل بعدين

النخي اخر شي بس دقيقة ياخذ النكهه ويوكون جاهز وبالعافية